പ്രണയത്തിൽ വളർത്താം നല്ല ശീലങ്ങൾ

ആരുടെയും ബന്ധങ്ങൾക്ക് കൃത്യമായ നിർവചനങ്ങൾ കൊടുക്കാൻ കഴിയില്ല. അതേപോലെ തന്നെ ഇന്ന രീതിയിൽ ജീവിച്ചാൽ എല്ലാം ഭംഗിയാകും എന്നും പറയാനാകില്ല. എന്നാൽ ചില കാര്യങ്ങൾ ശ്രദ്ധിക്കാം. പ്രത്യേകിച്ചും തീവ്ര പ്രണയത്തിലായിരിക്കുമ്പോൾ.


1. ആദ്യം ഒഴിവാക്കേണ്ടത് 'എക്സ് ' ഫാക്ടർ

നിങ്ങളുടെ പൂർവകാമുകൻ അല്ലെങ്കിൽ പൂർവകാമുകിയെപ്പറ്റി എപ്പോഴും പറഞ്ഞുകൊണ്ടിരിക്കുന്നത് നിങ്ങളുടെ ബന്ധം വഷളാക്കും. ആരായാലും ഇത് ഇഷ്ടപ്പെടില്ല. പ്രത്യേകിച്ച് ഇപ്പോഴത്തെ പങ്കാളിയേയും മുൻപത്തെ പങ്കാളിയേയും തമ്മിൽ താരതമ്യം ചെയ്യുന്നത്. ഇത് നിങ്ങളുടെ പങ്കാളിയെ മുറിവേൽപ്പിക്കും. അപ്പോൾ എക്സ് ബോയ്ഫ്രണ്ട് അല്ലെങ്കിൽ ഗേൾ ഫ്രണ്ടിനെ പുതിയ ജീവിതത്തിൽ നിന്ന് ഒഴിവാക്കൂ.


2. പരസ്പരം സ്പേസ് നൽകാതിരിക്കുന്നത്

എല്ലാം പങ്കാളിക്കൊപ്പം ചെയ്യാൻ ആഗ്രഹിക്കുന്നവരാണ് പ്രണയിനികൾ. എന്നാൽ നാളുകൾ കഴിയുമ്പോൾ ഈ പരസ്പരാശ്രയത്വം ബാധ്യതയായേക്കാം. ഇത് ബന്ധം വഷളാക്കിയേക്കാം. രണ്ട് പേർക്കും സ്വകാര്യമായ അൽപ്പം സമയം അല്ലെങ്കിൽ സ്പേസ് നൽകുന്നത് നല്ലതാണ്.


3. നിങ്ങളുടെ പങ്കാളിയിൽ മാറ്റം വരുത്താൻ ശ്രമിക്കുന്നത്

നിങ്ങളുടെ പങ്കാളിയുടെ നല്ലതിനെന്ന് പറഞ്ഞ് അയാളുടെ ചില ശീലങ്ങളെ മാറ്റാൻ ശ്രമിക്കരുത്. എല്ലാം തികഞ്ഞ ഒരാളെ ഒരിക്കലും കണ്ടെത്താനാകില്ല. അയഥാർഥമായ മാറ്റങ്ങൾ പ്രതീക്ഷിക്കരുത്. ഒരാളുടെ ജന്മനാ ഉള്ള സ്വഭാവത്തെ മാറ്റാൻ ശ്രമിക്കുന്നത് വിപരീത ഫലം ചെയ്യും.

4. ഓവർ സെൻസിറ്റീവ് ആവരുത്

നിസാര കാര്യങ്ങൾ വലുതാക്കി നാടകീയ മുഹൂർത്തങ്ങൾ ഉണ്ടാക്കരുത്. അൽപ്പസമയം കഴിഞ്ഞാൽ തീർച്ചയായും നിങ്ങൾ പശ്ചാത്തപിക്കും. ചെറിയ ചെറിയ പ്രശ്നങ്ങൾ പർവതീകരിക്കാതിരിക്കുക.


5. അനാവശ്യ സംശയം വേണ്ട

വിശ്വാസ്യതയാണ് ഏത് ബന്ധത്തിന്‍റെയും അടിസ്ഥാനം. പങ്കാളിയെ വിശ്വസിക്കുക. അവരുടെ സ്വകാര്യതയെ മാനിക്കുക. അനാവശ്യ സംശയങ്ങളുടെ പേരിൽ പങ്കാളിയുടെ ബാഗും ഫോണും ഡയറിയും ഫേസ്ബുക്കും ഒന്നും പരിശോധിക്കാൻ നിൽക്കണ്ട. എന്തെങ്കിലും സംശയമുണ്ടെങ്കിൽ നേരിട്ട് ചോദിക്കുന്നതാണ് നല്ലത്. ബെറ്റർ ആസ്ക് ദാൻ അസ്യൂം എന്ന് കേട്ടിട്ടില്ലേ.

6. വിരോധം വെച്ചുപുലർത്താതിരിക്കുക

ചെറിയ പ്രശ്നങ്ങളുടെ പേരിൽ വഴക്കുവേണ്ട. എന്നാൽ വഴക്കുണ്ടാക്കാതെ മനസിൽ വിരോധം വെച്ചു നടന്നാൽ പണി പാളും. ഇത് നിങ്ങൾക്ക് അനാവശ്യമായ ആകാംക്ഷയും ആശങ്കയും ഉണ്ടാക്കും. ശരിയായ സമയത്ത് ശരിയായ രീതിയിൽ സംസാരിച്ചാൽ പ്രശ്നങ്ങൾ പരിഹരിക്കാം. തുറന്നു പറയാതെ മനസിലിട്ട് പുകയ്ക്കുന്നത് കാര്യങ്ങളെ സങ്കീർണമാക്കും. വിരോധം വളർത്തും. ക്ഷമിക്കാനും മറക്കാനും പഠിക്കുക.

7. ശരിയായ ടൈമിങ്

പ്രധാനപ്പെട്ട കാര്യങ്ങൾ പറയുന്നത് സമയവും സന്ദർഭവും നോക്കി വേണം. പരസ്യമായി തർക്കിക്കുന്നത് വേണ്ടേ വേണ്ട. ആകെ ക്ഷീണിച്ച് ഉറങ്ങാൻ പോകുമ്പോൾ സീരിയസ് ചർച്ചകൾ വേണ്ട. മറ്റ് ടെൻഷനുകളില്ലാതെ സ്വകാര്യമായിരിക്കുന്ന നിമിഷങ്ങളിൽ ഇത്തരം കാര്യങ്ങൾ ചർച്ച ചെയ്യാം.