വിവാഹം കഴിഞ്ഞ് രണ്ടാംനാള്‍; സബ്. കലക്ടര്‍ ജോലിക്ക് ഹാജര്‍

കൊവിഡിനും ലോക് ഡൗണിനും ഇടയില്‍ വിവാഹിതയായ പെരിന്തല്‍മണ്ണ സബ് കലക്ടര്‍ അഞ്ജു രണ്ടാം ദിനം തന്നെ ഒഫീസില്‍ ഹാജരായി. കഴിഞ്ഞ ഏപ്രിലില്‍ നടത്താനിരുന്ന വിവാഹം ലോക് ഡൗണിനെ തുടര്‍ന്ന് മാറ്റിവെച്ചിരുന്നെങ്കിലും സര്‍ക്കാര്‍ അനുമതിയോടെ കഴിഞ്ഞ ശനിയാഴ്ചയാണ് വിവാഹിതയായത്. വെള്ളിയാഴ്ച രാവിലെയാണ് വിവാഹത്തിനായി സബ് കലക്ടര്‍ പാലക്കാടുള്ള വീട്ടിലേക്ക് എത്തുന്നത്.

അങ്ങനെ ആകെ മൂന്ന് ദിവസത്തെ ലീവില്‍ കൊവിഡ് പ്രോട്ടോക്കോള്‍ എല്ലാം പാലിച്ചായിരുന്നു അഞ്ജുവിന്റെ വിവാഹം. ഇന്നലെ മലപ്പുറം കലക്ട്രേറ്റില്‍ ജില്ലാ കലക്ടര്‍ ജാഫര്‍മാലികിന്റെ അധ്യക്ഷതയില്‍ നടന്ന കൊവിഡ് പ്രതിരോധ അവലോകന യോഗത്തിലും സബ്. കലക്ടര്‍
പങ്കെടുത്തു. ജില്ലാ പോലീസ് മേധാവി യു.അബ്ദുല്‍ കരീമും ഡിഎംഒ കെ സക്കീനയും ഉള്‍പ്പെടെ എല്ലാവകുപ്പ് മേധാവികളുടേയും സാന്നിധ്യത്തില്‍ നടന്ന യോഗത്തിലാണ് വിവാഹം കഴിഞ്ഞ രണ്ടാംദിവസം തന്നെ എത്തി അഞ്ജു പങ്കെടുത്തത്.

കൊവിഡുമായി ബന്ധപ്പെട്ട നിരവധി തിരക്കുകള്‍ കാരണമാണ് വെറും രണ്ടുദിവസത്തെ ലീവ് മാത്രം എടുത്തത്. ഒരു ദിവസം ഞായറായതും അവധി ദിനംകുറക്കാന്‍ കാരണമായി. പാലക്കാട് കൊട്ടേക്കാട് ആനപ്പാറ മേലെ പുരയിലെ അഞ്ജുവിന്റെ വീട്ടില്‍വെച്ച് കൊവിഡ് മാര്‍ഗ നിര്‍ദേശങ്ങള്‍ പാലിച്ച് ആയിരുന്നു വിവാഹം. പാലക്കാട് കുന്നത്തൂര്‍മേട് സ്വദേശിയും അഹല്യ ആശുപത്രിയില്‍ ഒഫ്ത്താല്‍മോളജിസ്റ്റുമായ ഡോക്ടര്‍ ജെ.നവറോഷ് ആണ് വരന്‍.

അടുത്ത ബന്ധുക്കള്‍ മാത്രമാണ് ചടങ്ങില്‍ പങ്കെടുത്തത്. ഏപ്രിലില്‍ നടത്താനിരുന്ന വിവാഹം ലോക് ഡൗണിനെ തുടര്‍ന്ന് മാറ്റിവെച്ചിരുന്നു. കൊവിഡ് കാലത്തെ തിരക്കേറിയ ഔദ്യോഗിക കൃത്യ നിര്‍വഹണങ്ങള്‍ക്കൊന്നും അവധി നല്‍കാതെ സബ് കലക്ടര്‍ ഡ്യൂട്ടിയില്‍ പ്രവേശിച്ചു. കോഴിക്കോട് സബ് കലക്ടറായും സേവനമനുഷ്ഠിച്ചിട്ടുള്ള കെഎസ് അഞ്ജു 2017 കേഡര്‍ ഐഎഎസ് ഉദ്യോഗസ്ഥയാണ്.